LA UNION – Nagpalawagen ti barangay chairman a nagbalin a kontrobersiya gapu iti panagdiskurso daytoy iti kasaran nga isu ti maibagbaga a makagapu a no apay a nagpapanaw dagiti bisita idiay Barangay Pao Sur, syudad ti San Fernando, La Union.
Iti pannakiuman ti Bombo Radyo kenni Pao Sur Barangay Chairman Emilio Ducusin, kinunana a saanna a kayat a ti ag-emcee iti nasao a kasaran ti kagawad iti Barangay Pao Norte a ni Loreto Galvez.
Sigun kenni Ducusin, kasapulan nga ipakada pay koma iti kagawad ti kabangibang a barangay kenkuana para iti panangimaton ti nasao nga okasyon.
Daytoy iti makagapu kinunana no apay a simmakit iti nakemna iti emcee ken kayatna a ti maysa a teacher sadiay iti mangiparang kenkuana wenno mangiturong iti programa.
Inaklon met ni Ducusin a nakainom daytoy iti arak idi nagsarita idi karabiyan ti okasyon ken ni Kagawad Galvez laeng iti pangiturturonganna iti mensahe wenno pungtot, ngem saan nga iti nagkasar.
Nagkiddaw met iti pammakawan ti kapitan kadagiti nagkasar, malaksid iti nagbalin nga emcee ti okasyon.
Immuna iti daytoy, panggep ti newly wed a mangidatag iti reklamo wenno kaso kontra ti nasao a barangay chairman gapu iti saan a maiparbeng a diar daytoy iti okasyonda.
Nagaawid met dagiti bisita ken dagiti makisala kalpasan a marengrenganda iti pagdidiskurso ti kapitan.
Nakaro met iti pannakadismaya ti newly wed ken nakasamngit pay ti bride gapu iti nakababain nga inaramid ti nasao nga opisyal iti sango dagiti bisita.
