Impannakkel ni U.S. President Donald Trump a nadadael dan ti kangatoan a rangtay idiay Iran, sumagmamano laeng nga oras kalpasasn ti panangiwaragawag ti posible a kanayunan nga aksyon-militar.
Segun kadagiti opisyales ti Iran, target ti panagraut ti B1 bridge sadiay Karaj, Tehran. Kinuna ni Ghodratollah Seif, deputy governor ti Alborz province a saan a bumaba ti tallo a tattao dagiti pimmusay bayat a 95 met dagiti nadundunor.
Gapo iti limitasyon kadagiti gubuayan ti damag ket saan pay a mapasingkedan ti international media ti kalawa ti perdisyon ken ti espisipiko a bilang dagiti natnatay ken nadangran.
Kabayatanna, kinondenar met ni Iranian Foreign Minister Abbas Araghchi ti panagraut ket kinuna a ti panag-target kadagiti sibilyan ken imprastraktura ket saan a mangpaabak iti pagilian da.
Impadamag met ti state television a namindua a daras a natirwan ti rangtay, nu sadinno iti maikadua a panagraut ket kabayatan pay iti panagtulong dagiti emergency responders kadagiti biktima.
Ti B1 bridge a madama paylaeng a maar-aramid ket inladawan ti Iranian media kas kangatoan a rangtay idiay Middle East nga adda kangato a 136 metres.
