Pinasingkedan ni US President Donald Trump iti maysa a press conference idi kalman a nakasakay iti US warship ni Venezuelan President Nicolas Maduro ken First Lady Cilia Flores ken agturong idiay New York.
Sumangoda kadagiti kaso a kriminal mainaig iti sakdal ti US Department of Justice a mangak-akusar kadakuada ti pannakairaman iti panagkikinuplot ti narco-terrorism.
Immunan a kinumpirma ni Trump a naarestar ni Maduro kadua iti First Lady, kasaruno ti nailunsad a large-scale strike ti Estados Unidos idiay Caracas a kabisera ti Venezuela.
Segun kenni Venezuelan ruling party leader Nahum Fernández, nakemmeg ni Maduro ken ti First Lady bayat ti kaaddada iti pagtaengan a masarakan iti uneg ti Fort Tiuna military installation idiay Caracas.###
