Pinasingkedan ni Venezuelan National Assembly Chief Jorge Rodriguez a dimmanonen ti 6,125 ti bilang dagiti pimmusay iti twin-earthquake a nangdayeg iti pagilian da idi Hunyo 24.
Nasurok makabulan idi dimmuprak dagiti magnitude 7.5 ken 7.2 a ginggined ket impadamag dagiti otoridad nga aganay 200 a pasdek ti narpuog, kaadwan ket adda sadiay coastal state ti La Guaira a kakaroan a naapektaran.
Nangatngato daitoy ngem iti immuna a death toll a 5,546 bayat nga agtultuloy met iti rescue team ken pamilya dagiti biktima iti panagbiruk kadagiti mapukpukaw.
Kinuna ni La Guaira Governor Jose Alejandro Teran a 1,400 nga indibidwal pay dagiti mapukpukaw ken agarop 17k dagiti nadundunor.
Malaksid kadagiti 190 pasdek a naan-anay a narpuog, 6,400 pay nga istruktura ti nailasin kas “high-risk” ken 9,800 a dadduma pay ti naibilang kas “restricted housing” gapo ta napeggad dan kadagiti residente.
Iti agdama ket aganay 24k a tattao idiay La Guaira ken Caracas iti temporario nga agnanaed kadagiti makeshift shelters.
Inaprobaran metten dagiti mamanday-linteg ti Venezuela ti maysa a gakat a mangpalaka ti panag-abang kadagiti sanikua tapno matulongan dagiti biktima ti ginggined, ngem kasapulan pay a permaan daitoy ni Interim Leader Delcy Rodriguez tapno naan-anay nga agbalin a linteg.
