LA UNION – Nag-resign ni Vice President Sara Duterte a DepEd Secretary ken National Task Force to End Local Communist Armed Conflict (NTF-ELCAC) Vice Chair, epektibo inton Hulyo 19, 2024 wenno eksakto makabulan kalpasan ti anunsiyo na idi kalman, Hunyo 19.
Impaganetget ni Vice President Sara Duterte, a ti nasao a desisyon ket saan a kinalupoy ngem ketdi panangisakit kadagiti mangisursuro ken estudyante.
Inwaragawag na daytoy iti sango dagiti kameng ti media idi kalman, kalpasan ti dua a tawen a panagtakem iti Department of Education.
Segun kenni VP Sara, impasa na ti irrevocable resignation letter na kenni President Ferdinand Marcos Jr. idi kalman, Hunyo 19 banag nga inawat met ti Presidente.
Kinuna na a nangaramid ti 30 nga aldaw a notice para iti naannayas a panangiyakar ti posisyon iti sumaruno a madutokan a sekretaryo ti Departamento ti Edukasyon.
Iti panagsarita ni VP Sara, imbaga na nga uray saanen a sekretaryo ti edukasyon, agtalinaed a nakabantay ken tumakder para iti pagimbagan dagiti manursuro ken agad-adal ditoy pagilian.
Pinagyamanan pay ni Duterte dagiti partner agencies iti gobyerno, lokal a gobyerno, private sector partners ken dagiti imbilang na a pamilya iti DepEd.
Awan iti dinakamat ti Bise Presidente a makagapo iti panaglosolos na kas DepEd Secretary.
Kabayatanna, naglosolos pay a Vice Chairperson ti National Task Force to End Local Communist Armed Conflict (NTF-ELCAC)
Maipalagip nga iti inisyal a kayat ni VP Sara ket madutukan kas sekretaryo ti Department of National Defense (DND) ngem iti impaay kenkuana ti Presidente a posisyon ket kas DepEd Secretary.
