BR LA UNION – Ikonkonsidera ita ni sigud a Senate President Vicente ”Tito” Sotto III a mabalin nga adda pakainaiganna iti impeachment case ni Vice President Sara Duterte ti pannaka-ikkat na iti liderato ti Senado.
Iti maysa nga interview kalpasan a sukatan ti baro a Senate Presidenta ni Alan Peter Cayetano, imbaga ni Sotto nga “strong possibility” a naapektaran ti posisyon na, iti imbaga na nga ag-convene a dagus ti Senado kas impeachment court apaman a maawat da iti Articles of Impeachment kontra kenni VP Sara Duterte.
Nupay kasta, impaganetget ni Sotto nga awan ti sakit ti nakem na iti pannaka-ikkat na ken paset laeng daytoy ti nabayagen a kapadasanna iti pulitika.
Kinuna na a namin-adun a daras a nasukatan isuna iti puwesto sipud nagbalin a senador idi 1992, ngem aw-awatenna daytoy kas normal a kalakaran iti uneg ti Senado.
Kinuna pay ti sigud a lider ti Senado, maipagarop nga awan ti direkta nga immasideg kenkuana tapno ipalawag ti makagapo iti panagsukat ti liderato.
Iti posible nga impeachment trial ni VP Sara ket manamnama a mapasamak idiay Senado kalpasan a maipasa ti Nababa a Pagpandayan Linteg ti Kongreso iti Articles of Impeachment kontra kenkuana.
