Impakdaar ti World Health Organization (WHO) iti kumarkaro a krisis ti salun-at idiay Middle East ken paset ti Europa gapu iti agtultuloy a tension ken rinnupak iti rehion.
Segun ti WHO, dagiti kangrunaan a pangta ket pakairamanan ti immadu a trauma, pannakadangran, ken pannakabaldado, kinakurang ti access iti medikal a serbisio dagiti evacuees, ken ti peggad ti panagwaras ti sakit kadagiti evacuation center. Ad-adda a kumaro daytoy gapu iti pangta iti suplay ti nadalus a danum kalpasan ti panangraut kadagiti desalination plants, kasta met ti posibilidad a mapasamak dagiti kemikal, biolohikal, radiolohikal, wenno nuklear nga insidente.
Nadakamat met iti panagngato ti heat-related illnesses, mental health distress, ken respiratory diseases, bayat a dagiti panangraut kadagiti pasilidad ti lana idiay Iran, Bahrain, ken Saudi Arabia ti nangigubuay ti polusion ken kinakurang ti enerhia. Naapektaran met dagiti serbisio medikal gapu iti panangraut kadagiti pasilidad ti salun-at a nakatayan ti sumagmamano a health workers.
Mainayon pay, dagiti pannakasinga dagiti supply chain ken immadu a gastos iti transportasion ket manglimitar iti suplay dagiti nasken nga agas.
Iti laksid daytoy, sinigurado ti WHO, iti pannakitinnulong ti United Nations ken dadduma pay a grupo, ti agtultuloy a pannakaipaay dagiti medikal a suplay, panagsanay, ken pannakapapigsa ti disease surveillance, kasta met ti pannakaipasdek ti alternatibo a ruta a mangidanon iti tulong kadagiti naapektaran a lugar.
Ipakita ti report ti nasaknap nga epekto ti gubat, saan laeng nga iti seguridad no di ket nangruna iti salun-at dagiti umili iti rehion ken iti intero a lubong.###
