BALAOAN, LA UNION – Natay ti maysa a 20-anyos a lalaki bayat a nadundunor met ti sakay na kalpasan a masagid ti nagluganan dagitoy a tricycle ti kutit wenno likudan ti trailer truck iti national highway a masakupan ti Brgy. Cabua-an, Balaoan, La Union agarup alas-11:50 tattay aldaw, May 20.
Nabigbig ti pimmusay ken nagmaneho iti tricycle a ni Reymar Balaoeg, residente ti Brgy. Poblacion, Dolores, Abra bayat a nabigbig met ti nadundunor a sakay na a ni Mabel Turqueza, 28-anyos, ken residente iti San Juan, Abra.
Base iti imbestigasyon ti Balaoan Police Station, daldalyasaten ti truck a minaneho ni Randy Altero, 43-anyos, residente ti Bucay, Abra, ti abagatan a direksyon iti kalsada bayat nga agpa-amianan a direksyon ti tricycle a minaneho ti biktima.
Nag-overtake ti trailer truck iti sarsarunwenna a tricycle ket kabayatan ti panagsubli daytoy iti linya na ket nasagid ti tricycle a minaneho ni Balaoeg ti akinlikudan a paset ti truck.
Nagsagaba iti nakaro a pannakadundunor dagiti biktima nangnangruna ti driver iti tricycle nga isu ti rason ti dagus daytoy nga ipupusay bayat a saan met a naan-ano ti driver iti truck.
Naamwan a paawiden dagiti biktima idiay Abra kalpasan da a nagiproseso ti passport ditoy syudad ti San Fernando idi napasamak ti insidente bayat a mapan met agala ti suplay ti semento idiay Bacnotan ti driver ti trailer truck.
Naamwan manipud iti imbestigador a naglibas pay ti driver iti truck ngem na-corner da met laeng daytoy idiay ili ti Luna, La Union.
Iti agdama, agtaltalinaeden iti kustodiya iti Balaoan Police Station ti driver iti truck bayat a maururay ti pamilya dagiti biktima. Kabayatanna, nakarwar metten iti pagagasan ti sakay iti tricycle a ni Turqueza.
