Dead on the spot ti maysa a mister idinto a nasugatan ti asawa na kalpasan nga madungpar iti naglugananda a tricycle iti kawatiwatan ti Barangay Madayegdeg, San Fernando City, La Union alas 5:20 itay parbangon.
Nabigbig ti pimmusay a biktima a ni Placido Apiado, 74 anyos, bayat a ti asawa na ket nabigbig a ni Carmelita Apiado, 69, agpada nga residente ditoy syudad.
Maibasar iti nakalap nga imbestigasyon iti Bombo Radyo News Team, karuruar dagiti ag-asawa iti balayda tapno mapan makimisa idi a mapasamak ti aksidente.
Agpada nga agturturong iti daya a direksyon ti tricycle sken iti kotse a minaneho ni Ian Paul Velasco, 30-anyos, residente iti San Juan, La Union.
Iti imbestigasyon dagiti kameng ti San Fernando City Police ket maipagarop a napaspas iti panagpataray ti kotse ken maipagarop a nakainom ni Velasco.
Maipagarop nga kellaat a nadungpar ti kotse iti kutit ti tricycle. Gapu ti kinapigsa iti pannakadungpar ket naisina iti atep ti tricycle iti sidecar ken motor.
Awan pay iti desisyon ti pamilya dagiti naulila idinto a naiturong iti kustodiya ti kapulisan ni Velasco.
Naiturong metten iti punerarya ti bangkay ti biktima.
Agtultuloy ti imbestigasyon iti insidente.
