Binilin iti International Criminal Court (ICC) ni sigud a Presidente Rodrigo Roa Duterte a pisikal a dumar-ay ti amin nga aldaw iti panagusig ti sangsangwen na a crimes against humanity, a nakatuding a mangrugi inton Nobyembre 30, 2026 sadiay The Hague, Netherlands.
Impaganetget manen ni ICC Trial Chamber III Presiding Judge Joanna Korner daitoy a pammilin iti maikalima ken maudi a status conference iti kaso idi Lunes, Nobyembre 2.
Immanamong met iti lead defense counsel ni Duterte a ni Peter Haynes ken impasiguro iti panagdar-ay iti kliyente na iti courtroom iti panagrugrugi iti trial.
Nupay napalubosan nga aglangan iti status conference ti sigud a president kalpasan nga i-waive na iti karbengan a dumar-ay, agtaltalinaed met nga obligado a sumango isuna kadagiti sumaganad nga aldaw.
Kabayatanna, pinasingkedan met ni Senior Trial Lawyer ken ICC Prosecutor Julian Nicholls a nasurok-kumurang 29 a testigo manipud ditoy Pilipinas ti manamnama a mangipaay iti testimonya babaen iti video wenno audio-visual link (AVL).
Gapo iti pito nga oras a deperensya ti Pilipinas ken ti The Netherlands ket pinirmis iti ICC iti iskedyul tapno saan a lumagpas iti alas-otso ti rabii idiay Maynila ti panagsao dagiti testigo.
Posible a nasapsapa iti panagrugi ti panagdengngeg idiay The Hague – agarop alas-otso iti bigat, katupag iti alas-tres ti malem ditoy Pilipinas.
Binilin pay ni Judge Korner iti prosekusyon nga unaen a denggen dagiti testigo a personal a sumango iti korte sakbay dagiti mangipaay iti testimonya babaen ti video conferencing tapno mapagtalinaed iti napirmis a taray iti proseso.
Karaman pay kadagiti logistical adjustments ket iti panangpirmis iti seating schedule idiay courtroom ken panangiruar ti naituding nga oras para iti panaginana, pangngaldaw, ken afternoon breaks.
