LA UNION – Dead on arrival idiay ospital ti maysa a 63-anyos a lola kalpasan a madalapus daytoy iti motorsiklo idiay kawatiwatan ti Maharlika Highway a sakupen iti Barangay Damortis idiay ili ti Rosario, La Union.
Nabigbig ti pimmusay a ni Priscila Ducusin, residente ti nasao a barangay; kabayatan a nasugatan met dagiti naglubbon iti motosiklo nga isuda Dante Gatchlian, 21, nagmaneho ti lugan, ken John Paul Trangco, 20, agpada nga agnanaed idiay Barangay Tubod, ili Sto. Tomas, La Union.
Base ti imbestigasyon ti Rosario Police, kabayatan nga agbalballasiw iti nadakamat a kalsada ti baket ket maipagarup a killaat a nadalapus daytoy iti motorsiklo.
Dagus a naiturong idiay ospital dagiti tallo, ngem nauyos iti biag ni Ducusin ken madama met nga agpapaimbag dagiti agkalubbon ti lugan gapu iti nilak-am a sugat dagitoy.
Iti agdama, dukduktalen iti pulisya ti posible a sungsungbatan dagiti naglubbon iti motorsiklo gapu ti napasamak nga aksidente.
