LA UNION – Naideklara a dead on arrival iti pagagasan idiay ili ti Tagudin, La Union ti maysa nga ubing kalpasan a nalmes iti irrigation canal idiay Sitio Calingat, Barangay Agdeppa, ili ti Bangar, La Union.
Ti biktima ket nabigbig a ni Mark Jake Abayon, agtawen iti maysa, a residente iti nasao a lugar.
Maibasar iti impormasion manipud iti Bangar Police Station, naamuan a nagturong iti sari-sari store ti inauna a kabsat ni Mark Jake ngem saanna a nadlaw a simmurot kenkuana ti ubing.
Idi agawid ket nakitana laengen ti tsinelas ti ubing iti kalsada isu a dagus a nagdamag iti lolada.
Naudin ti amin idi nasarakan ti bagi ti biktima a tumtumpaw iti irigasion ken saanen nga agang-anges.
Dagus met daytoy a naitaray iti ospital ngem pimmusay met laeng.
