LA UNION – Umabot iti 11 a tattao iti inarestar dagiti otoridad manipud iti tallo a barangay ditoy syudad ti San Fermnando, La Union a nakaisayangkat ti anti-illegal gambling operations.
Iti operasyon ti pulisiya ket naiganwat iti Barangay Parian, Sevilla, ken Tanqui.
Dagiti naarestar a suspek ket pakaibilangan iti 6 a babbalasang nga agtawen ti 22 agingga 34; 2 a misis; maysa a 46-anyos a lalaki; maysa a 65-anyos a lola ken maysa met a 71-anyos a lolo.
Dagitoy ket naaktuan nga agsug-sugal iti tong-its ken bingo.
Malaksid kadagiti playing cards ken bingo cards, nakakumpiskar dagiti otoridad iti pakabuklan a P533 a bet money.
Pada-pada dagiti 11 nga indibiduwal a naiyindurso iti cuerpo ti pulisiya ken sumangsango dagitoy iti kaso a panaglabsing iti P.D. 1602 wenno illegal gambling law.
