Balligi ti pannakipaset ti Bombo Radyo La Union para ti tinawen a Dugong Bombo “A little pain, a life to gain,” maysa nga inisyatiba ti Bombo Radyo Philippines, kabinnulig ti Bombo Radyo Philippines Foundation, Incorporated ken dagiti kameng ti Philippine Red Cross idi kalman ditoy ciudad ti San Fernando.
Napalawa itan ti venue agsipud ta immanamong iti management ti SM City La Union nga ijay a maiyuswat iti inisyatiba, makalawas laeng sakbay iti mismo nga event.
Dumanon ti 145 dagiti registrants ken 125 kadagitoy ti balligi a nakaidonar ti dara bayat a dua met ti napaay. Manipud iti nasao a bilang ket 64-anyos a lakay ti kataengan a nakaidonar bayat a 18 met a Criminology Student ti kaubingan.
Adda iti maysa a natalimudaw kabayatan ti panagdonar na ken dua met dagiti nagulaw. Agpapada dagitoy a damdamo da paylaeng ti agdonar iti dara.
Maysa kadagiti kapaotanen a makipaspaset iti kakastoy nga aktibidad ket ni Mr. Christopher Camero manipud ili ti Balaoan, La Union. Aganay 25 a tawenen manipud idi rinugian na iti agdonar ti dara wenno idi pay tawen 2000.
Impannakkel ni Christopher a saan isuna a makapadpadas ti aniaman a sakit gapo iti pannakipaset na kadagiti blood-letting activities ken innayon a kas Pilipino ket napintas ti agdonar agsipud ta makatultulong ka kadagiti agkasapulan.
Kabayatanna, naikkan met ti bitamina, hot meals, mainom, ken limited edition Dugong Bombo Shirt dagiti successful blood donors.
