Nakasaganan iti Philippine Red Cross (PRC) para iti 2025 Midterm Elections manipud Mayo 9 agingga 12.
Mangideploy ti PRC kadagiti 2,260 volunteers ken staffs, 28 emergency vehicles, 103 foot patrol units, ken 51 mobile units ti intero a pagilian bayat nga adda met pakabuklan a 38 nga ambulansya ti naka-standby kadagiti kangrunaan a lugar kasta met a naka-alerton dagiti nabatbati pay a 178 nga ambulansya kadagiti local chapters ti ahensya.
Mangipasdek da pay kadagiti 291 first aid stations ken 146 welfare desks kadagiti airports, terminals, barangay halls, malls, pagadalan, ken istasyon ti tren kasta met a nakabantayen dagiti 143 volunteers iti tunggal barangay.
‘Just dial 143 if you need help…. Whether it is election-related, whether you need an ambulance. Somebody will answer. People will answer. We will have more people here by that time,’ kinuna ni Gordon.
Pinaregta ti PRC Chairman ken CEO a ni Dick Gordon iti publiko nga agbotos ken dagos a tumawag ti hotline 143 nu adda ti aniaman nga emergency. Impaganetget na pay ti kinapateg ti natalged a panagbiahe kadagiti probinsya.
‘If you feel like you need assistance, if you feel bad, if you feel anxious. Red Cross is there to help but we are not there to put our body to stop the violence,’ innayon na.
Segun met kenni PRC Secretary-General Doctor Gwen Pang, nakasaganan amin nga humanitarian services ti PRC — kabunnulig dagiti Blood Services, Emergency Response Units, ken Disaster Management Services — a mangsungbat iti aniaman nga insidente.
