BR LA UNION – Naka-high alert iti Philippine Red Cross (PRC) kalpasan ti kellaat a panagngato ti aktibidad ti Bulkan Mayon idi Sabado, Mayo 2.
Maibasar iti report, agarop 4:28 ti malem, napasamak iti lava collapse a nangigubway ti rockfalls ken ashfall iti asideg a lugar.
Napasarunwan ti density currents (PDCs) iti Mi-isi Gully iti abagatan agingga iti abagatan-a-laud a paset ti bulkan.
Kagiddan daytoy, nakapuwesto iti RC143 volunteers idiay Camalig, Guinobatan, Legazpi City, ken Daraga tapno mangipaay ti real-time a dokumentasyon ken updates iti operations center.
Agtultuloy ti koordinasyon ti PRC kadagiti lokal nga otoridad ken disaster response agencies tapno masiguro ti kinatalged dagiti residente idiay Bicol.
Nagballaag ti PRC iti komunidad a saan a sumrek kadagiti danger zone, nangruna iti pagayusan ti karayan ken gullies a mabalin a pagnaan ti napaspas a taray wenno ayus ti nabara a gas ken debris.
Nabalakadan pay dagiti umili nga agtalinaed iti uneg ti balay nu adda ashfall, agusar iti protective masks, ken siguradwen a naka-abbong wenno nakaluban iti taraon ken danum tapno maliklikan iti kontaminasyon.
Iti sabali a bangir, iti Bulkan Kanlaon ket nangipugso met ti napuskol a dapo manipud iti summit crater agarop ala 1:25 PM idi kalman, Sabado.
Segun iti PHIVOLCS, umabot iti 700 metro ti kangato ti plume sakbay a naitayab agturong iti laud abagatan-a-laud.
Agtaltalinaed iti Alert Level 2 ti Kanlaon, a kaipapanan nga adda moderate unrest ngem awan pay ti indikasyon ti napigsa a panagbettak.
