Nangiruar ti flight safety advisory ti Civil Aviation Authority of the Philippines (CAAP) kasaruno ti panagbittak ti Bulkang Mayon sadiay Albay idi kalman Biyernes, Oktubre 30.
Inruar ti Civil Aviation Authority of the Philippines ti Notice to Airmen (NOTAM) a mangsaksaklaw kadagiti flight asideg iti bulkan.
Naballakadan met dagiti flight operator a liklikan ti lugar gapu ta nakaipasodengen ti nasao a bulkan ti Alert Level 3.
Balido ti pakdaar manipud 1:27 ti malem idi kalman Oktubre 30 agingga iti 11:53 a.m. ita nga aldaw Oktubre 31.
Segun iti Philippine Institute of Volcanology and Seismology (PHIVOLCS), nangrugi ti kalkalainganna a panagbettak iti alas 11:53 ti bigat idi kalman ken nangipugso ti asok nga immabot ti 3,000 metro manipud crater, agturong iti laud-abagatan a laud a dereksyon.
Kabayatanna, Kinuna ti Department of social welfare and development(DSWD), karaman kadagiti naibakwit ket dagiti residente ti Barangays Anoling, Sua ken Quirangay iti munisipalidad ti Camalig nga adda iti uneg ti innem a kilometro a Permanent Danger Zone.
Iti alas 4 ti malem idi kalman, Biernes, addan nasurok nga 417,886 a family food packs a nakasagana a maiwaras, malaksid pay kadagiti dadduma pay a non-food ken ready-to-eat supplies.
Mabalakadan met dagiti umili iti uneg ti danger zone a mangisuot iti facemask ken suroten dagiti bilin ti panagbakwit ken agtalinaed nga alerto iti posible nga ayus ti lava, pyroclastic density currents ken lahar.
