Napadasan ti sumagmamano a komunidad asideg ti Bulkan Mayon idiay probinsia ti Albay iti ashfall idi kalman gapu iti agtultuloy a panagabante ken panagreggaay ti murdong ti baro a lava flow iti Mi-isi Gully, segun ti Philippine Institute of Volcanology and Seismology (Phivolcs).
Segun ti Phivolcs, agtultuloy iti apagapaman nga ashfall kadagiti komunidad iti abagatan ken daya a paset ti bulkan gapu iti nakapsut nga angin iti aglawlaw ti Mayon.
Nailista met ti state seismologists iti 28 Strombolian eruptions wenno panagbettak nga addaan ti nagduduma a durasion agingga ti alas-4:49 idi malem kalman.
Saan a maammuan iti kangato ti maris dapo nga asok nga inpugso ti bulkan, ngem nakita nga agturong daytoy iti abagatan-a-daya.
Agtultuloy nga adda iti Alert Level 3 ti Bulkan Mayon sipud pay idi Enero 6, a kaipapanan nga addaan ti nangato a posibilidad ti napeggad a panagbettak ken agtaltalinaed nga aktibo iti bulkan.
Binalakadan ti Phivolcs dagiti residente kadagiti apektado a lugar nga agtalinaed nga alerto ken suruten dagiti abiso dagiti lokal nga autoridad tapno masigurado iti kinatalged bayat nga agtaltalinaed iti aktibidad ti bulkan.###
