Pinasingkedan ni Department of Justice Secretary Jesus Crispin Remulla a dagiti 15 a kameng ti Philippine National Police ket adda itan ti sidong ti ‘restrictive custody’ tapno saanen a makadangran pay gapo iti pannakairaman da ti kaso dagiti mapukpukaw a mammallot.
Impasiguro ni Remulla nga agtultuloy ti panagimbestigar ti departamento agingga a saan a naipapaay ti hustisya kadagiti biktima ken kakabagian da.
Mainaig met ti iggem da a witness a ni Julie ‘Dondon’ Patidongan wenno alias ‘Totoy,’ inbinglay ti DOJ a naaddaan dan ti panagtaripnong kenni PNP Chief General Nicolas Torre III para ti panangprotektar iti serguridad ti biag na.
“Oo, under the protection of the PNP tsaka may restriction na nga sa 15 tao ng PNP na involved dito sa missing sabungero case”
Imbutaktak ni Julie ‘Dondon’ Patidongan ti partisipasyon ni Charlie ‘Atong’ Ang kas mastermind iti kaso kasta met iti aktres a ni Gretchen Barretto a makaammo kadagiti operasyon agsipud ta kanayon da nga agkadwa ni Ang.
Kabayatanna, pinaglibakan met ni Atong Ang ti alegasyon ken impaganetget na nga awan ti kredibilidad wenno basaran dagiti pammabasol maibusor kenkuana.
Laksid kadagiti nabara a sinnnungbat ti nagsinnumbangir a dasig, impasiguro ni Remulla a maiserbi iti hustisya ken saan a malaokan ti kwarta iti imbestigasyon tapno mairuar iti kinapudno.
Gapo met iti panagrang-ay ti kaso ket mangnamnama dagiti kabagian dagiti mapukpukaw a mammallot a magun-od dan iti hustisya kalpasan iti aganay uppat a tawen a panag-uray kasaruno dagiti rebelasyon ni alias Totoy.
