BR LA UNION – Epektibo iti kanayunan a kontribusyon iti Social Security System (SSS) idi Enero 1, 2025.
Maiyannurot daytoy iti Republic Act No. 11199 wenno Social Security Act of 2018, a pinirmaan kas linteg ni sigud a President Rodrigo Duterte idi 2018.
Manipud 14 percent idi 2024, iti SSS contribution ket ngimmato ti 15 percent ita a tawen.
Iti baro a sistema, 10% iti kontribusyon ket ibaklay ti employer, bayat a ti nabatbati a 5% ket bayadan dagiti mangmangged.
Kas pangarigan, iti empleyado nga agsuwel-suweldo ti ₱20,000 kada bulan ket addaan ti monthly contribution a ₱3,000. Iti nasao a kantidad, ₱2,000 iti bayadan ti employer idinto a ₱1,000 iti empleyado.
Nu iti mangmangged ket agsuwel-suweldo ti ₱10,000 per month, iti total contribution na iti SSS ket ₱1,500. Ngem ₱1,000 iti bayadan ti employer idinto a ₱500 ti kontribusyon ti empleyado.
Nairanta iti SSS contribution hike, tapno mapatibker iti pondo ti SSS ken mapasayaat ti benepisyo dagiti miyembro agingga tawen 2053.
Segun kenni SSS Public affairs and Special Events Acting Head Carlo Villacorta, iti 15 percent rate ket final tranche iti contribution hike a nangrugi idi 2019.
Impaganetget ni Villacorta, a nu saan a gapu iti nasao a linteg, mabalin nga in-inut a bumaba ti SSS fund iti sumaganad a pito a tawen.
