LA UNION- Dumaon ita iti 18 dagiti mangmangged iti gobyerno iti sapasap nga Rehiyon Uno ti naipaayan ti panangbigbig kas Outstanding Public Officials and Employees, iti sidong ti Honor Awards Program ti Civil Service Commission (CSC) Region 1.

Daytoy ket manipud iti 30 dagiti nominees a sinagat ti Regional Committee on Awards nga imatmatunan ti Civil Service Commission.

Napili dagiti regional winners kalpasan iti nainget a deliberasyon nga inganwat ti komite iti tallo a kategorya.

Kabilang ditoy ti Presidential Lingkod Bayan Award, CSC Pagasa Award, ken Dangal ng Bayan Award.

Kabayatan na, naamuan ti Bombo Radyo La Union nga iti nasao a bilang ti mangibagi iti Rehiyon para iti national level.

Maysa kadakuada ti kuwalipikado para iti Presidential Lingkod Bayan Award (individual category); 9 para iti CSC Pagasa Award (individual) ken 3 para iti group category; ken 5 ti makipaset para iti Dangal ng Bayan Award (indvidual).

Nakatuding met nga ipaay ti nasao a pammadayaw iti 18 regional winners iti ma-ika 118 nga tawen ti selebrasyon ti Phil Civil Service inton Disyembre 2018.

Ti tema ita nga tawen iti Phil. Civil Service Anniversary ket “Lingkod Bayan, Maka-Diyos, Makatao, Makabayan.”