LA UNION – Natay iti 18 a tattao kalpasan iti tallo a coordinated ken nagsasaruno a panagbettak ti bomba idiay Nigeria.
Immuna a napasamak ti panagbettak ti bomba iti maysa a pasken wenno kasaran idiay northeast Borno state, maikadwa iti General Hospital Gwoza ken maikatlo iti maysa a lamayan.
Saan met a bumaba iti 50 a tattao dagiti napsugatan ken matamtaming ita iti naduma-duma nga ospital.
Segun kenni Barkindo Saidu, director general ti emergency management agency idiay Borno State, tallo a female attackers iti mapapati a rimmaut iti tallo a lokasyon idiay Gwoza, iti siyudad a naminsanen a nagbalin a sentro ti insurhensiya iti militant group a Boko Haram iti napalabas a 15 a tawen.
Inawagan met ni Nigerian President Bola Tinubu iti insidente kas “desperate acts of terror”.
Awan pay ti grupo a nangaklon iti napasamak a kinadamsak.
