BR LA UNION – Agtultuloy iti panangsapol dagiti otoridad idiay Indonesia kadagiti innem pay a mapukpukaw a mangmangged kalpasan ti panagdayusdos dagiti dadackel a bato iti maysa a pagminasan idiay Cirebon, West Java.
Umaboten ti 19 iti kumpirmado a natay bayat a walo ti nasugatan, segun iti Basarnas search and rescue agency.
Segun kadagiti opisyal, delikado ti nasao a lugar iti panag-reggaay agsipudta maipagarop a saan a sumur-surot iti pagannurutan para iti kinatalged dagiti mangmanged ti kompanya.
Segun iti Gobernador ti West Java a ni Dedi Mulyadi, kasapolan a mairutan ti regulasyon kadagiti pagminasan.
Rinugyanen ti Ministry of Energy and Mineral Resources iti imbestigasyon seknan iti nagtaudan ti trahedya.
Segun iti Geological Agency, nalukneng ti daga iti lugar ken a nangato iti rangkis, banag a delikado nu agtudo.
Nagballaag dagiti eksperto a posible a maulit ti panagreggaay, isunga nabalakadan nga agannad dagiti agresponde nangruna nu agtudtudo.
