BR LA UNION – Inarestar dagiti kameng ti Aringay Municipal Police Station iti dua a menor de edad a lallaki gapu iti kaso a homicide.
Idi Abril 14, 2025 tiniliw dagiti otoridad dagiti suspek idiay Barangay Poblacion, Aringay maiyannurot iti warrant of arrest nga impaulog ti Regional Trial Court, Branch 31, idiay Agoo, La Union.
Adda pakainaiganna ti kaso iti maipagarop a panangpatay dagiti suspek iti pada da a menor de edad idiay Barangay Alaska, Aringay idi baro a tawen, Enero 1, 2025.
Maibasar iti report ti Aringay Police Station, tallo dagiti maipagarop a suspek a nang-atakar iti biktima bayat ti panag-iinom dagitoy idi baro a tawen.
Idi natumba ti biktima, maysa kadagiti suspek ti maipagarop nga armado ti kutsilyo ket binagsol na iti biktima ti namin-adu a daras.
Nagsagaba iti biktima ti lima a bagsol iti bagi, tallo iti kannigid ken dua iti kannawan a paset ti bagi na, a puon ti dagus a nakatayan daytoy.
Iti agdama, maysa a suspek ti at-large ken agtultuloy a sap-sapolen dagiti otoridad tapno magun-od ti pamilya ti biktima iti naan-anay a hustisiya.
