Nagdinnungpar ti dua a motorsiklo iti paset ti National Highway ti Brgy. Pagdalagan ditoy Siudad ti San Fernando.
Segun ken ni PSSg Glendora Peralta, ti Duty Desk Officer ti City of San Fernando Police Station, nabigbig ti driver ti Honda Click 185 nga agmaris ti nangisit a ni Rogelio Pacleb y Obar, agtawen ti 31, awanan asawa ken residente ti Brgy. Bumbuneg iti ili ti San Gabriel.
Idinto a nabigbig met ti driver ti Yamaha RS 100 nga agmaris ti nangisit a ni Apple Bhoy Concha y Perez, agtawen ti 24, naasawaan ken agnanaed iti Brgy. Sevilla, Purok 8 ditoy Siudad.
Inlawlawagna a basar iti naisayangkat nga imbestigasion, bayat a dumaldalyasat ti nangiturong ti Honda Click 185 nga agturong nga agpaamianan ket dita a kellaat a dimmungpar ti sarsarunnuenna a Yamaha RS 100 nga agturong met laeng iti kapada a direksion.
Gapu iti daytoy, inbatadna a nagsagaba ti sugat iti nagduduma a paset ti bagi dagiti maseknan a dagus met a naitaray iti balay-pagagasan para iti naan-anay a pannakataming dagitoy.
Inpakaammona a maibasar iti liquor test ti driver ti Yamaha RS 100 ket nagpositibo daytoy nga adda ti impluwensiya ti nasanger idi napasamak ti desgrasia.
Innayonna a saan met pay a nakapagsasarita dagiti agsinnungbangir a partido kalpasan a mannarimaan pay laeng ti pannakadeterminar nu mano ti balor ti pannakadadael ti sumagmamano a parte ti dua a motorsiklo.
