BR LA UNION – Inpadamag ti Philippine Consulate General (PCG) idiay Milan ti pannaka-aresto iti dua a Pinoy idiay Italy gaputi maipagarop a pannakairaman dagiti dua iti drug trafficking.
Maibasar iti report ti PCG, dagiti dua a Pinoy ket maipagarop a karaman iti panaggatang ken panagilako ti shabu iti nasao a pagilian.
Segun iti konsulada, maitipon dagiti dua iti dadduma pay a Pilipino nga immunan a naaresto iti nasao a pagilian gapu iti pannakairaman iti maipagarop a transaksiyon iti iligal a droga.
Saan pay a ninaganan ti konsulada dagiti dua a Pilipino ngem naballaagan dagiti Pinoy a suruten ti linteg idiay Italy.
Binilin iti konsulada dagiti Pinoy a liklikan ti agaramid ti maikaniwas tapno saan a madadael iti imahe dagiti Pilipino a nasayaat ti panagtrabaho da sadiay.
Sakbay daytoy, pinalagipan ti konsulada dagiti Pilipino kontra iti saan a naingkalintegan a panangusar iti pampubliko a parke kalpasan a masita ti sumagmamano a Pinoy a maipagarop a nangisayangkat ti gambling ken drinking activities idiay Parco Bande Nere, maysa a parke idiay Milan.
