BR LA UNION – Natay iti dua a lallaki nga agpapaay kas caretaker ti maysa a pupokan, kalpasan a natamaan dagitoy ti kimat idiay Barangay Narvacan, Santo Tomas, La Union.
Iti exclusive interview ti Bombo Radyo iti pannakangiwat ti La Union Police Provincial Office a ni PMAJ Lawrence Ganuelas, binigbig na dagiti biktima nga isuda Antonio Dela Cruz, 51-anyos, addaan asawa ken John Rex Asaldo, 21-anyos, awanan asawa ken agpada a tubo ti Barangay Binakod, Paombong, Bulacan.
Maibasar iti report, dagiti dua a biktima ket adda da iti kubo idi kellaat a nagkimat ti napigsa ket timmama ti kimat iti kubo ken kadagiti biktima.
Dead on arrival dagiti dua idiay La Union Medical Center idiay Agoo, La Union.
Kinuna ni Major Ganuelas, posible a ti nakakabit a solar panel iti tuktok ti kubo iti rason ti pannakakimat dagiti biktima.
Mainaig ti daytoy, nagpalagip manen dagiti otoridad a liklikan ti rumwar kadagiti pagtaengan no napigsa iti tudo ken panagkimat ken liklikan ti agturong kadagiti vulnerable a lugar tapno maliklikan ti pannakaisagmak.
