LA UNION – Sampaan iti pulisya ti kaso idiay piskalya dagiti dua a criminology students karaman ti maysa pay a baro gapu ti maipagarup a panaglako ti droga idiay Barangay San Nicolas Norte, ili ti Agoo, La Union.
Nabigbig dagiti estudyante nga isuda Prince Oscar Javier, 20, 4th year college; ken Rafael Paneda, 19, 3rd college student; karaman ti maysa pay a suspek nga agnagan iti Bryan Calonge, 22, agpada a residente ti nasao nga ili.
Naammuan ti Bombo Radyo manipud idiay Agoo Police Station, nakompiskar manipud kadagiti suspek ti lima a sachet a naglaon iti maatap a marijuana, buybust money a naaramat iti transaksyon ken dagiti drug paraphernalia.
Maipagrup nga immuna a natiliw ni Javier gapu ti panangidiaya daytoy ti droga ken simmaruno a naaresto iti dua pay a madama nga agpa-pot session.
Agtultuloy pay laeng iti imbestigasyon ti pulisya tapno maammuan ti paggapgapuan ti droga a maipagarup nga ar-aramaten dagiti suspek.
