LA UNION – Natay iti dua a lallaki kalpasan a dinungpar ti van iti nagluganan dagitoy a biskleta with sidecar, iti kawatiwatan ti national highway idiay Barangay Calungbuyan, Balaoan, La Union.
Nabigbig dagiti biktima nga isuda Jose Orcales ken Pepe Opinaldo, 50-anyos, agpada a residente ti Barangay Apatut iti nasao met laeng nga ili.
Nabigbig met iti respondent driver ti van a ni Jimmy Valderama, 40, addaan asawa, residente ti Quezon City.
Base iti inisyal nga imbestigasyon ti Balaoan Police Station, agpada iti direksiyon a tur-turongen dagiti dua a behikulo, umun-una iti bisikleta ken sumarsaruno met iti van, idi kellaat a nadungpar ti naud-udi iti nagluganan dagiti biktima.
Dagus a naiturong dagiti dua iti Bacnotan District Hospital idiay Bacnotan, La Union ngem naideklara a dead-on-arrival ni Orcales.
Naiyakar met ni Opinaldo iti Ilocos Training and Regional Medical Center ditoy syudad ti San Fernando ngem pimmusay met laeng bayat a maag-agasan gaputi nakaru a pannakadangran iti bagi kalpasan ti aksidente.
Naamwan a mapan koma gumatang dagiti aggayyem iti karne a lutuen da para iti panagkasangay iti anak ti maysa kadagiti biktima, idi mapasamak ti trahedya.
Kabayatanna, iti met respondent driver ket naipasidong iti custodiya ti Balaoan Police Station tapno sangwen iti reklamo wenno kaso a maidatag kontra kenkuana.
