SAN JUAN, LA UNION – Nadundunor ti 2 nga indibidwal kalpasan nga aksidente a maidungpar iti kayo ti nagluganan dagitoy a motorsiklo iti kalsada a masakupan ti San Juan-San Gabriel Provincial Road iti Brgy. Catdungan, San Juan, La Union itay tenga ti rabii.
Nabigbig dagiti biktima nga isuda Nick Aaron Paragas, 23-anyos, ken ti kinalubbon na a ni Kirk Bandayrel, 23-anyos ken agpada dagitoy a residente iti Brgy. Tanqui, City of San Fernando, La Union.
Base iti impormasyon manipud San Juan Police, daldalyasaten ti motorsiklo a nagluganan dagiti biktima ti laud a direksyon iti kalsada ket idi nakadanon dagitoy iti pakurbada a paset maipagarup a napukawan ti kontrol ti driver iti manibela iti motorsiklo rason iti pannakaidungpar dagitoy iti kayo ken pannakatumba da iti abagatan a paset ti kalsada.
Nagsagaba iti pannakadundunor dagiti biktima kasaruno ti pannakaiturong dagitoy iti pagagasan para iti pannakataming da.
Naamwan manipud iti imbestigador a paawiden dagiti biktima idi napasamak ti insidente manipud iti ili ti San Gabriel.
