Nagsagaba ti sugat iti nadumaduma a paset ti bagida ti dua nga indibidual kalpasan a nabagbagsol dagitoy idiay Barangay Bangbangolan, San Fernando City, La Union agarop alas 8:50 idi rabii.
Nabigbig dagiti biktima nga isuda John Cleo Dela Cruz, 17 anyos, baro ken Clemente Dela Cruz, 54 anyos, addaan asawa, agpada a residente ti Barangay Abut, idinto a ti suspek ket nabigbig a ni Avelino Hufalar, 38 anyos, naasawaan ken residente ti Barangay Bangbangolan ditou syudad.
Maibasar iti imbestigasyon ti San Fernando Police Station, dagiti biktima ket inawis ti managan Ernesto Mayo, addaan ti umno nga edad ken residente ti Barangay Bangbangolan para iti kasangay daytoy.
Kalpasan iti sumagmamano nga oras idi nga agawiden dagiti biktima ket dagus a binagbagsol ida ti suspek iti awan a rason babaen iti inusar daytoy a buneng nga nagresulta ti pannakadangran dagiti immun-una.
Dagus met nga natiliw ti suspek ken naiturong iti pagbaludan para iti umno a disposisyon.
