Pinirmaan ni Presidente Ferdinand Marcos Jr. iti Executive Order No. 130 a mangituding ti mas nalawlawag a sistema ken giya iti panagsuspinde ken panagtuloy ti klase iti pampubliko ken pribado a pagadalan ken iti learning centers.
Nakailanad iti EO No. 130 a maipaayan ti bileg dagiti local a gobyerno (LGU) ken mismo nga school head, nga agdesisyon ken mangideklara ti suspensyon ti klase maibasar iti aktuwal ken dokumentado a kondisyon iti masakopan da a lugar (localized wenno granular suspension).
Nailawlawag pay nga uray masuspinde iti in-person wenno face-toface classes, saan a kaipapanan nga awanen ti serrek.
Mabalin latta nga itultuloy ti panagadal dagiti estudyante babaen iti naduma-duma a learning continuity measures kas ti modular, online, wenno distance learning, depende iti sitwasyon wenno kalamidad.
Ti nasao a direktiba ket nairanta tapno agbalin a mas risk-informed ken maitunos iti agdama a sitwasyon iti ground ken maliklikan iti nalawa ken saan a maiparbeng a panang-kanselar ti klase.
Manamnama a mairuar iti implementing guidelines manipud Department of Education Philippines (DepEd) iti uneg ti 30 nga aldaw kalpasan nga agbalin nga epektibo iti EO No. 130.
