LA UNION – Dead on arrival iti pagagasan ti dua nga indibidual idinto nga dua ti nasugatan kalpasan a maaksidente gapu iti motorsiklo iti nagduma a lugar idiay La Union.
Nabigbig dagiti pimmusay nga isuda Felix Estabillo, 33, security guard, residente ti Barangay Alcala ken Arthur Sampaga, 44, mekaniko, addan asawa, ken residente ti Barangay Nagrebcan idiay ili ti Luna, La Union.
Iti nakalap nga impormasyon ti Bombo Radyo La Union kenni PSSg Rajie Sansano ti Balaoan Police naggapu idiay ili ti Bacnotan ken agturturong iti amianan a direksyon ni Estabillo no sadino kalubbon na da Rene Cabida, 22, baro, negosyante, residente ti Narvacan, Ilocos Sur, ken Fernando de Guzman, 39, barangay tanod, residente ti Barangay Alcala idi a dimmungpar dagitoy iti maysa a poste ti kuryente iti paset ti Luna-Bacnotan road.
Gapu iti kinapigsa ti pannakaidungpar maipagarop nga napuruan iti ulo ni Estabillo a makagapu ti dagus daytoy nga ipupusay.
Kabayatan na, segun met kenni PSSg Joseph Millares ti Luna Police, daldalyasaten ti biktima a ni Sampaga ti Luna-Balaoan road agturong iti laud a direksyon idi a mapukawan ti kontrol agingga a maidungpar iti maysa a puon ti kayo.
Naamuan nga agpada a paawiden dagiti nasao a biktima idi a mapasamak iti aksidente.
