Imbinglay ti food vlogger a ni Ninong Ry iti napadasan a pannubok ti pamilya da sakbay a maipasngay iti putot na a ni Rafa, nga idi laeng napalabas ken nirambakan iti umuna a bulan ti pannakasangay na.
Babaen iti social media post, inistorya ni Ninong Ry a dua a daras da a nakapadas ti miscarriage iti partner na a ni Belle sakbay a nagsikog manen.
Idi agangay, naamwan da nga addaan ti Antiphospholipid Antibody Syndrome (APAS) ni Belle, maysa a kondisyon a mabalin a mangigubuay ti komplikasyon iti panagsikog.
Gapu iti daitoy, naipasidong isuna iti panagagas ken kasapulan a matudukan inaldaw tapnu makatulong a mapagtalinaed iti sikog na.
Laksid kadagiti pannubok, natalged a naipasngay ni Rafa, nga inawagan da kas rainbow baby wenno maladaga a naipasngay kalpasan a makapadas ti miscarriage.
