LA UNION – Dua a tattao ti nailista a natay ken tallo dagiti nasugatan iti dimmuprak a bagyo Emong ditoy probinsiya ti La Union.
Maibasar daytoy iti latest situational report ti Provincial Disaster Risk Reduction and Management Office (PDRRMO) idi Sabado, Agosto 2, 2025.
Dagiti biktima ket pakaibilangan ti maysa a 12-anyos nga ubing, Grade 7, residente ti Barangay San Felipe, San Juan a natupakan ti kayo ti mangga iti pagtaengan da iti kangitingitan ti bagyo Emong idi Hulyo 25.
Iti maikadwa a natay a lalaki ket gapu iti pannakalmes. (Awan pay ti naan-anay a detalye na daytoy.)
Kabayatanna, pakabuklan a 128, 402 a pamilya wenno buklen ti 370, 624 nga indibiduwal iti naapektaran ti napalabas a bagyo Emong.
Naggapo dagitoy iti 414 a barangay kadagiti sumaganad a lugar: San Fernando City, Bacnotan, Balaoan, Bangar, Luna, San Gabriel, Santol, Sudipen, Bauang, Caba, Aringay, Agoo, Santo Tomas, Rosario, Pugo, Tubao, Naguilian, Burgos, ken Bagulin, La Union.
Pakabuklan met a 4, 122 a babbalay iti nadadael bayat a 33, 332 iti pinerdi ti bagyo Emong.
Nagsubli metten iti naan-anay a supply ti koryente iti pito nga ili bayat a dagiti dadduma pakaibilangan ditoy siyudad ti San Fernando ket in-inut a maisubsubli babaen kadagiti electricians.
Kabayatanna, nangisayangkat ti aerial inspection ni Gov. Mario Eduardo Ortega kadwana ti sumagmamano a kameng ti Office of Civil Defense ken Armed Forces of the Philippines idi Miyerkoles (July 30), tapno kitaen iti kalawa ti didigra nga imbati ti bagyo emong iti intero a probinsiya ti La Union ken madetermina iti kasapolan a tulong dagiti naapektaran nga umili.
Maipalagip a naipasidong iti Signal #4 iti probinsiya ti La Union iti panagduprak ti bagyo Emong idi Hulyo 25, 2025.
