LA UNION – Nadundunor iti dua a tattao kalpasan ti karambola iti tallo a motorsiklo, iti kawatiwatan ti national highway, sakop ti Barangay Baccuit Sur, Bauang, La Union.
Dagiti karaman iti aksidente ket iti chop-chop motorcycle a minaneho ti managan Eddie Padua, 48, residente ti Barangay Taberna, Bauang; maikadwa a motorsiklo a minaneho ti managan Ramon Arangorin, 48, residente ti Barangay San Marcos, Agoo ken maikatlo a motorsiklo a kukua ken minaneho met iti managan Michael Angelo Gurion, 28, residente ti Barangay Lingsat, San Fernando City, La UnION.
Base iti initial report ti Bauang Police Station, iti chop-chop motorcycle ket agturturong iti daya a direksiyon ken bumallasiw koma iti national highway idi naidungpar daytoy iti agpa-abagatan a motorsiklo a minaneho ni Arangorin.
Maipagarop a nagposipos iti chopchop ken naidungpar pay daytoy iti maysa pay nga agpa-abagatan a motorsiklo a minaneho ni Gurion.
Kas resulta, nagsagaba iti pannakadun-dunor ni Gurion ket naiturong ken nataming iti maysa a pribado nga ospital ditoy syudad.
Ni met Padua a nagpasar iti minor injuries ken Arangorin a saan a nadunor iti insidente ket agpada a naiturong iti ITRMC para iti medikasyon ken AB verification.
