Ginatang ti Office of the President ti nasurok kumurang 20 a tonelada a gulay manipud kadagiti mannalon ti La Trinidad, Benguet ken Urdaneta, Pangasinan tapno ibunong kadagiti nagduduma a komunidad sadiay Metro Manila.
Segun iti Presidential Communications Office (PCO), karaman kadagiti makaawat ket ti Caloocan, Navotas, Malabon, Quezon City, Pasay, Maynila, DSWD NCR para ti Walang Gutom Kitchen, New Bilibid Prison sadiay Muntinlupa, Manila City Jail, ken sumagmamano nga orphanage wenno bahay-ampunan.
Indauloan ni Presidente Ferdinand Marcos Jr. ti panangikarga kadagiti gulay iti OP Bus kadwa dagiti mannalon.
Tarigagay ti direkta a panaggatang ti gobierno a nayunan ti biruk dagiti mannalon, makaiwaras ti sadiwa a taraon kadagiti komunidad, ken maliklikan ti pannakasayang ti apit.
