LA UNION – Inaprubaranen ti Senado iti gakat a 2025 national budget nga agbalor ti P6.352 trillion.
Daytoy ket babaen ti 18 a nagbotos a pabor, awan ti kimmontra ken maysa ti nag-abstain.
Immuna a sinertipikaran ni President Ferdinand Marcos Jr. iti 2025 budget kas urgent ken impasa daytoy ti Senado iti maikadwa ken maikatlo a panagbasa iti uneg ti maysa nga aldaw.
Inlawlawag ni Senate Minority Leader Aquilino Pimentel III iti panag-abstain na, agsipudta saan a pabor iti desisyon dagiti padana a mammanday linteg.
Inlawlawag met ti pada na a Minority Senator a ni Risa Hontiveros a nagbotos a pabor nga ipasa ti budget, agsipudta nanayunan ti pondo para iti Inter-Agency Council against Trafficking ken iti National Coordination Center Against Online Sexual Abuse and Exploitation of Children and Child Abuse and Exploitation Materials.
Inikkat ti Senado iti P39.8 bilyon nga alokasyon para iti Ayuda para sa Kapos ang Kita Program (AKAP) ti Department of Social Welfare and Development agsipudta naitipon daytoy iti Assistance to Individuals in Crisis Situation (AICS) program.
Iti AICS ket pinag-debatian ti House of Representatives ken Senado idi bicam agsipudta maipagarop nga inraman ti house leader ti AKAP iti DSWD nga awan ti ammo ti sumagmamano a senador.
Nanayunan pay ti budget ti Philippine National Police tapno makaipatakder dagitoy ti 54 a police station iti naduma-duma a local government units.
