BR LA UNION – Inikkat iti puwesto ti Philippine Army (PA) dagiti 23 a suldado gaputi pannakatay iti maysa a baro a recruit, kalpasan a napukaw ti puot na kabayatan ti reception rite iti headquarters ti 6th Infantry Battalion (IB) idiay Datu Piang, Maguindanao del Sur.
Segun kenni 6th ID Spokesperson Lt. Col. Roden Orbon, nairanta ti relief order tapno ipaayan dalan ti imbestigasyon seknan iti pannakatay ni Private Charlie Patigayon, 22-anyos, manipud Barangay Mukas, Kolambugan, Lanao del Norte.
Maipalagip nga immuna a nai-report a natay ni Patigayon gaputi kidney failure idi Hulyo 30, 2025.
Naamwan nga iti 6th IB ti umuna a nakai-destinuanna kalpasan ti tallo-bulan a military training idiay probinsiya ti Tarlac idi Pebrero agdama a tawen.
Innayon ni Orbon a kadagiti 23 a na-relieve iti puwesto, 21 kadagitoy ket kabilang iti maysa a platoon iti sidong ti kapada a company bayat a dagiti dua ket agpada a company commanding officer ken executive officer, nga addaan ti ranggo a lieutenant.
