Arestado iti maysa a 23-anyos a lalaki iti insayangkat a buy bust operation iti nagtipon a puwersa ti City of San Fernando Police Station, Phil. Drug Enforcement Agency (PDEA), ken dadduma pay a law enforcement unit, iti Barangay Madayegdeg ditoy siyudad agarop alas 6:30 idi bigat kalman, Setyembre 12, 2023.
Babaen iti impakat dagiti otoridad nga Aggressive and Honest Law Enforcement Operations, naarestar iti managan Jose Luis Alfonso Soriano, baro, tubo ti Brgy Rizal, Roxas Isabela.
Maibilang daytoy kas Newly Identified iti kaso nga adda pakainaigan na iti iligal a droga.
Maibasar iti report, nakumpiskar manipud iti ikot ti suspek iti pakabuklan a tallo a plastic sachet ti maipagarop a shabu, mapatta-patta nga agdagsen amin ti 0.9 grams ken agbalor ti nasurok kumurang a P6,000.00.
Nakumpiskar pay kenkuana iti naduma-duma a drug paraphernalia, cellular phone, maysa a genunine one thousand peso bill a nagserbi kas buy bust money, ken ti inusar na a motorsiklo, color gray, ken awanan ti plate number.
Iti suspek ket adda ita iti custodiya dagiti otoridad ket nakatuding a maidatagan ti kaso a panaglabsing ti RA 9165 wenno Comprehensive Dangerous Drugs Act of 2002.
