Nagnumar dagiti 245 a senior citizens iti libre nga eye consultation, panagited ti reading eyeglasses, ken diabetes awareness services babaen ti Gabay ng Paningin Program Year 3 a naisayangkat idi Hulyo 9, 2026 idiay Luna Sports Center.
Naipatungpal iti programa kas paset iti panagrambak ti Municipality of Luna iti National Diabetes Awareness Week, a maangay tunggal maikapat a lawas ti bulan ti Hulyo.
Iti maikatlo a tawen ti programa, agtultuloy nga iyas-asideg ti Local Government Unit of Luna, iti panangidaulo ni Mayor Gary N. Pinzon, iti dekalidad a serbisio iti panangtaripato ti mata babaen ti Operation Big Heart.
No kadagiti naglabas a tawen, nakapamaysa iti programa kadagiti ubbing, agtutubo, ken nataengan. Ita a tawen, naited ti kangrunaan a prayoridad kadagiti senior citizen nga addaan ti diabetes gapu ta nangatngato iti peggad ti diabetes-related vision impairment.
Impalagip ni Mayor Gary N. Pinzon nga iti panangtaripato ti panagkita ket kaipapanan ti panangsalaknib iti panagwaywayas, dignidad, ken kalidad ti biag dagiti senior citizen.
Kinunana a napateg ti regular nga eye examination ken umiso a panangimanehar iti diabetes tapno maliklikan ti permanente a pannakapukaw ti panagkita.
Nagbalin a kangrunaan a paset ti programa ti diabetes awareness lecture, comprehensive eye examinations nga insayangkat dagiti medical specialist, libre a panangipaay ti reading eyeglasses, ken referrals kadagiti benepisyario nga agkasapulan ti kanayunan nga ophthalmologist care.
Nagbalin a posible iti programa babaen ti Municipal Health Services Office, kadua ti Ilocos Training and Regional Medical Center, Department of Health Center for Health Development I, ken Provincial Government of La Union babaen iti Provincial Health Office.
Itantandudo met ti Gabay ng Paningin Program iti panggep ti Municipality of Luna iti United Nations Sustainable Development Goals (SDGs), nangnangruna iti SDG 3 (Good Health and Well-Being) iti panangpalawa iti akses kadagiti preventive healthcare services, ken SDG 10 (Reduced Inequalities) babaen iti panangited ti dakalidad ken natalged a serbisyong pangsalun-at kadagiti vulnerable sector, nangnangruna kadagiti senior citizens, uray pay no ania ti kasasaadda iti ekonomia.###
