BR LA UNION – “Remember you are dust, and to dust you shall return” (3:19).
Mangisayangkat ti tallo a Nasantuan a Misa ti Saint William the Hermit Cathedral ita nga aldaw ti Miyerkoles, Marso 5, 2025 para iti obserbasyon ti Ash Wednesday.
Iti umuna a misa, naisayangkat itay alas 6:00 ti agsapa, second mass iti oras ti alas 12:00 ti aldaw ken iti last mass para ita nga aldaw ket maisayangkat iti oras ti alas 5:15 inton malem.
Idi kalman, Marso 4, naisayangkat ti Burning of Palms, wenno pannaka puor dagiti palaspas a nausar idi napalabas a tawen.
Ket iti napataud a dapo idi kalman, ti usaren para iti panangikabil ti simbolo a krus iti muging.
Daytoy ket mangipasimudaag iti pammati dagiti Kristiyano, a ti tao ket pinarsua ti Diyos manipud iti tapok, ket agtungpal met laeng iti tapok ti tao.
Iti Ash Wednesday ket marka ti umuna nga aldaw iti panawen ti Semana Santa para kadagiti Romano Katoliko.
Daytoy a panawen ket mangipalagip kadagiti Kristiyano a nasken nga agbabawi kadagiti basol, agkararag, agpenitensya ken agayuno babaen iti panangliklik ti pangtaraon ti karne tunggal Biyernes ken panag-sakripisyo ti bukod a panagessem iti uneg ti 40 nga aldaw agingga iti Easter Sunday wenno Aldaw a Panagungar.
