BR LA UNION – Lagipen ita nga aldaw ti Miyerkoles ti Katoliko iti intero a pagilian iti Ash Wednesday, kas senyal iti panagrugi ti 40 nga aldaw a panawen ti Kwaresma.
Rugyan daytoy nga aldaw dagiti deboto iti sagrado nga aramid – isuti panagkararag, panagayuno ken panagbabawi kas panagsagana iti Piyesta ti Panagungar.
Ti tinawen a pananglagip ti Kwaresma ket ibilang ti Simbaan kas ‘sentro’ ti pammati dagiti Kristiyano. Tunggal ‘ash wednesday’ maikkan ti krus a dapo iti muging kas senyal ti naimpuswan a panagbabawi kadagiti naaramid a basol ken panagsubli iti sidong ken pagayatan ti Diyos.
Ti Krus ket simbolo ti pannakaisalakan ken napudno a panagayat ti Diyos kadagiti annak na.
Malaksid iti ‘senyal ti penitensiya’ ti krus iti muging ket karit iti panagbalbaliw.
Ti maus-usar a dapo iti ASH WEDNESDAY ket agtaud iti napuoran a palaspas a nabendisyunan idi napalabas a Domingo Ramos.
Iti panangikabil ti dapo iti muging ket masansan a mapakuyugan iti sarita a: “Laglagipem a sika ket dapo, ket agsubli ka met laeng a dapo”. Mangipalagip daytoy a dagiti tattao ket managbasol, ken agsublin-to met laeng iti naggapwan a dapo.
Nagduma man ti kaugalian ken supertition dagiti Katoliko, ngem maymaysa ken agkaykaysa iti amin iti aldaw wenno panawen ti karidad wenno panagtitinnulong, panagayuno, panagkararag, agkaykaysa ti amin para iti napateg a panagsagana iti Aldaw a Panagungar.
