BR LA UNION – Saan a nakita ti bulan iti naisayangkat a moon sighting idi rabii (Pebrero 17) isunga inton Huwebes, Pebrero 19, 2026 a mangrugi ti bulan ti Ramadan.
Segun iti Office of the Darul Ifta babaen kenni Bangsamoro Autonomous Region in Muslim Mindanao Executive Director Ustadz Marhan Borhan, awan ti nailista nga aktuwal a pannaka-sirpat iti crescent moon iti naisayangkat a monitoring idiay Timako, Cotabato City.
Gaputi dayta, naituding ti panagrugi ti Ramadan inton Huwebes, Pebrero 19, 2026, maiyannurot iti Islamic tradition a kasapolan nga aktuwal a makita ti baro a bulan sakbay nga ideklara a mangrugi ti panagayuno.
Ti umuna nga aldaw ti puasa wenno fasting para kadagiti Muslim ket iti isu met laeng nga aldaw, kas paset iti sagrado a bulan ti panagayuno, panagkararag ken panagsakripisyo.
