Opisyalen nga indeklara ti National Commission on Muslim Filipinos (NCMF) nga inton umay a Sabado, Marso 21, ti panagrambak ti Eid’l Fitr wenno iti pista ti panagleppas ti nasantuan a bulan ti Ramadan.
Ti proklamasyon ket inaramid ni NCMF Secretary Sabbuddin Abdurahim kasaruno a saan a nasaripatpatan ti baro a bulan iti moonsighting idi aldaw ti Huwebes, Marso 19.
Kinuna ni Abdurahim a ti aktibidad ket naisayangkat babaen ti tulong ti Department of Science and Technology State Weather Bureau Bangsamoro Darul Ifta’ (BDI), kasta met ti nagduduma nga Ulema ditoy pagilian, grupo dagiti muslim scholars a nakapamaysa iti Islamic sacred laws.
Gapo ta saan a nasaripatpatan ti crescent moon, matuloy ti panag-ayuno agingga iti pormal a selebrasyon iti kaaldawan ti Sabado.
Iti kangitingitan ti anunsyo ket nangipadanon met ti mensahe ti sekretaryo a ti Eid’l Fitr ket maysa a sagrado a panawen iti panagyaman, panagkaykaysa, ken panangipaay ti tulong kadagiti marigrigat.
Agtalinaed latta nga holiday ti intero a pagilian ita nga aldaw ti Biernes, Marso 20, kas maibasar metten iti immun-una a deklarasyon ti Malacañang a panangbigbig iti kinapateg ti okasyon para ti komunidad dagiti kakabsat a Muslim.
Ti Eid’l Fitr ket maysa laeng kadagiti dua a kapatgan a pista ti relihiyon nga Islam, nu sadinno ket agkakadwa dagiti mamatpati para ti espesyal a kararag ken panagdadanggay iti panagleppas ti maysa-bulan nga ayuno.
