BR LA UNION – Na-ospital ti tallo a lallaki kalpasan iti panangbugbog dagiti maipagarop a bouncers ti maysa a bar idiay Barangay Urbiztondo, San Juan, La Union.
Napasamak iti komosyon agarop alas 3:40 ti agsapa idi Domingo, Agosto 17, 2025.
Dagiti biktima ket pakaibilangan iti agkabsat nga agtawen ti 19 ken legal age, residente ti Barangay Ili Norte, San Juan ken maysa a gayyem da a 18-anyos, residente ti Barangay Talogtog.
Bayat a ti suspek ket agtawen ti 25, addaan asawa, tubo ti Calbayog, Samar, Leyte ngem agdama nga agnanaed iti Barangay San Francisco, San Fernando City, La Union kadwa na dagiti dadduma pay a saanen a nabigbig a bouncers iti maysa a bar.
Maibasar iti initial report ti San Juan Police Station, magmagna dagiti biktima iti nasao a lugar idi maipagarop a kinarit ti suspek iti maysa kadagiti biktima.
Timpuar ti nabara nga argumento iti baetan dagitoy agingga a napasamak ti pisikal a laban ken nakiraman metten a kimmabil ti dadduma pay a bouncers.
Kas resulta, nagpasar ti pannakadun-dunor iti naduma-duma a paset ti bagi dagiti tallo a biktima.
Naiturong idiay Bacnotan District Hospital dagiti agkabsat babaen kadagiti personnel ti San Juan Police Station idinto a ti maysa ket naiturong idiay Ilocos Training and Regional Medical Center (ITRMC) babaen kadagiti nagresponde a kameng ti MDRRMO San Juan.
Saan pay a nalawag nu anya ti pudno a motibo iti napasamak a komosyon ken agtultuloy iti imbestigasyon dagiti otoridad.
