LA UNION – Sumangsango itan ti panaglabsing iti kaso a Comprehensive on Dangerous Drugs Act dagiti tallo a babbaro a natiliw gapu iti maipagarup a panagaramat dagitoy iti droga kabayatan nga adda dagitoy iti uneg ti maysa nga inn idiay Barangay 4, syudad ti San Fernando, La Union.
Naammuan ti Bombo Radyo manipud ti San Fernando City Police, dua kadagiti suspek ket agpada a college student, kabayatan a ti maysa ket out of school youth.
Nakompiskar manipud kadagiti suspek iti uppat a sachet a naglaon iti shabu, tallo a sachet iti maatap a marijuana ken dagiti drug paraphernalia.
Dagus a rinaut dagiti pulis ti nasao a pasdek kalapsan a nakaawat dagitoy iti impormasyon a maipagarup nga agar-aramat iti droga dagiti suspek.
Kabayatanna, dua kadagiti suspek iti immaklon kadagiti otoridad a nagaramat ti droga gapu iti panangpilit dagiti dua a babbai a kaddua dagitoy a nag-check in iti nadakamat nga inn.
Naglibakan met dagiti suspek a kukuada dagiti nakompiska a droga ken impaganetgetda a kukua dagiti babai a rimmuar manipud iti uneg ti inn sakbay a nakasangpet dagiti pulis iti itudtudoda a nangitugot kadagitoy.
