LA UNION – Isagsaganan ti pulisya ti kaso kontra kadagiti tallo a natiliw a drug personality babaen ti nagsina nga anti-illegal drug operation idiay probinsya ti La Union.
Iti report a nakalap ti Bombo Radyo manipud iti La Union Police Provincial Office, arestado iti agnagan Jerry Abat, 22, gapu iti maipagarup a panaglako daytoy ti maysa a sachet a naglaon iti marijuana idiay Barangay Talogtog, ili ti San Juan.
Nakabaluden ti 19-anyos a suspek a ni Armin Munio ti Barangay Raois, Bacnotan, La Union kalpasan a matiliwan daytoy nga aglaklakao iti maysa a sachet ti maatap a marijuana idiay Barangay Ili Norte, San Juan.
Gapu iti panaglako iti maysa a sachet ti maatap a marijuana idiay Barangay Bacani, Rosario ket imbalud met dagiti otoridad ti suspek a ni John Joven Maburang.
Kabayatanna, napaay met ti pulisya a nadanun iti balayda ti suspek a ni Oliver Valdina tapno isirbi ti search warrant ket maituloy latta iti panangidatag ti kaso kontra kenkuana gapu ti maipagarup a panagikot daytoy iti dua a sachet naglaon iti maatap a shabu ken dagiti bala ti paltog.
