LA UNION – Naminsan manen a nangipakita ti panangkontra babaen iti panangisayangkat ti tignay-protesta iti mapatta-patta 300 residente iti plaza ti syudad ti San Fernando, La Union.
Iti pannakiuman ti Bombo Radyo kenni Cris Palabay, lider ti Save the Beauty of La Union Coalition, kinuna na a madanaganda nga amangan ituloy ti Global Luzon Energy Development Corp. iti panangipatakder ti twin coal fired power plant idiay ili ti Luna iti probinsya.
Kayatda laeng nga ipalagip a babaen ti tignay-protesta ket naingetda a kontraen iti plano a panagipatakder ti planta gapu iti dakes nga epekto na iti aglawlaw, pagbiagan ken salun-at ti tao.
Segun pay kenni Palabay, inton bulan ti Agusto plano a marugyan ti konstraksyon ti planta isu a kayatda daytoy nga lapdan.
Naamuan nga ti nasao a coal fired power plant ti Global Luzon Energy Development Corp. ket agbalor ti P80 billion ken plano nga ipatakder daytoy idiay Barangay Carisquis ken Nalvo Sur iti nasao nga ili.
