BR LA UNION – Im-imbestigaran ti Armed Forces of the Philippines (AFP) ti posible a koneksiyon dagiti 31 nga indibiduwal a maatap a kameng ti private armed group nga immunan a tiniliw ti Special Operation Command Trident North ken Army’s 501st Infantry Brigade idiay Pidigan, Abra.
Maibasar iti report, immuna a naaresto dagiti 10 nga indibiduwal a nakalugan iti innem a behikulo nga armado ti nangangato a kalibre ti paltog, a kas ti uppat nga M16 rifles, maysa a Bushmaster rifle, ken lima a 45 caliber pistols.
Nagsasaruno pay a naaresto iti 21 a tattao iti nagsisina nga operasyon ken nakumpiskaran iti sumagmamano a paltog.
Segun iti Northern Luzon Command ken PNP, kit-kitaen da iti posible a koneksiyon dagitoy ken nu anya ti papel da kalpasan a madetermina a supporters dagitoy ti rival group idiay Pidigan Abra.
Iti agdama, adda iti kustodiya ti Pidigan Municipal Police Station dagiti naaresto nga indibiduwal bayat nga agtultuloy ti imbestigasyon ken maisag-sagana metten ti legal nga aksiyon kontra kadagitoy.
Agtultuloy iti panangduktal dagiti otoridad ti records dagiti nakumpiskar a paltog ken posible a dadduma pay a nakausaran dagitoy.
